Saratov viloyati ma'muriyati xorijiy ishchi kuchidan foydalanish bo'yicha yangi qoidalarni tasdiqlash arafasida. 2027-yil 1-yanvardan boshlab mintaqada patent bilan ishlovchi migrantlar uchun o'nta yangi iqtisodiy faoliyat turi taqiqlanishi rejalashtirilmoqda. Tegishli xulosa Iqtisodiy rivojlanish vazirligi tomonidan imzolangan bo'lib, yakuniy qaror viloyat gubernatori tomonidan qabul qilinishi kutilmoqda.
Yangi cheklovlar asosan hayotiy muhim infratuzilma sohalarini qamrab oladi. Xususan, elektr energiyasi, gaz va bug' bilan ta'minlash, suv ta'minoti va suv chiqarish tizimlari, shuningdek, yuk tashish xizmatlarida xorijliklarning ishlashiga ruxsat berilmaydi. Avvalroq mintaqada yo'lovchi tashish, taksi, kuryerlik, umumiy ovqatlanish, ta'lim, sog'liqni saqlash va davlat boshqaruvi organlarida ham shunga o'xshash taqiqlar joriy etilgan edi.
Viloyat Mehnat va ijtimoiy himoya vazirligi ushbu choralar mintaqa iqtisodiyotiga salbiy ta'sir ko'rsatmasligini va mahalliy aholining bandligini ta'minlashga yordam berishini ta'kidlamoqda. Rasmiylarning fikricha, bu qadamlar jamoat xavfsizligini ta'minlash maqsadida amalga oshirilmoqda.
Ish beruvchilarga o'z shtat jadvalini yangi talablarga moslashtirish uchun 2027-yil 1-yanvargacha vaqt berilgan. Ushbu davr mobaynida korxonalar xodimlarni qayta ko'rib chiqishlari va yangi qoidalarga muvofiq ish jarayonlarini tashkil etishlari talab etiladi.
