Xanti-Mansiysk avtonom okrugi (XMAO) rasmiylari 2027-yildan boshlab patent asosida mehnat qilayotgan xorijiy fuqarolar uchun soliq to'lovlarini taxminan 27 foizga oshirishni rejalashtirmoqda. Bu haqda hududning 2027–2029-yillarga mo'ljallangan soliq siyosati loyihasida so'z boradi.
Hujjatga ko'ra, mehnat bozori xususiyatlarini aks ettiruvchi mintaqaviy koeffitsiyentni 4,284 dan 5,445 gacha ko'tarish ko'zda tutilgan. Ushbu koeffitsiyent patent qiymatini hisoblashda qo'llaniladigan asosiy ko'rsatkichlardan biri hisoblanadi. Natijada, migrantlar har oyda davlat budjetiga avvalgidan ko'ra ko'proq mablag' o'tkazishlariga to'g'ri keladi.
Rasmiylarning ta'kidlashicha, mazkur o'zgarish xorijlik ishchilarning soliq yuklamasini Rossiya fuqarolari to'laydigan daromad solig'i (13 foiz) darajasiga yaqinlashtirish maqsadida amalga oshirilmoqda. Mintaqa gubernatori o'rinbosari Vera Dyudinaning so'zlariga ko'ra, yangi koeffitsiyent hisoblanayotganda migrantlar eng ko'p band bo'lgan sohalardagi o'rtacha ish haqi miqdori tahlil qilingan.
Ushbu tashabbus mintaqa deputatlari tomonidan ham qo'llab-quvvatlanmoqda. XMAO dumasi vakillari xorijlik ishchilarning soliq to'lovlarini oshirish orqali ularning mintaqa rivojiga qo'shayotgan hissasini ko'paytirish zarurligini ta'kidlashmoqda. Yakuniy to'lov miqdori mintaqaviy koeffitsiyentdan tashqari boshqa iqtisodiy ko'rsatkichlarga ham bog'liq bo'ladi.
