Xonanda Nargiz Zokirova o'zining shaxsiy blogida O'zbekistonni emas, balki AQSHni o'z vatani deb bilishini ma'lum qildi. San'atkor o'z tarixiy vatani bilan bog'liq voqealarni og'riqli qabul qilganini va o'zini xiyonatga uchragandek his etganini ta'kidladi. Uning so'zlariga ko'ra, dastlabki vaqtlarda bu holat unga kuchli azob bergan bo'lsa-da, hozirda u barchasini ortda qoldirib, AQSHdagi hayotiga e'tibor qaratgan.
Zokirova o'zbekistonliklarga nisbatan iliq munosabatda ekanini, ularni ajoyib insonlar deb bilishini qayd etdi. Biroq, xonandaning fikricha, vatan tushunchasi o'zaro muhabbatga asoslanishi kerak. U 1995-yilda ota-onasi bilan AQSHga ko'chib o'tgan va Amerika fuqaroligini olgan.
Eslatib o'tamiz, Nargiz Zokirova 2013-yilda Rossiyaning "Golos" shousida ishtirok etganidan so'ng keng ommaga tanilgan edi. Ukraina hududidagi voqealar boshlanganidan so'ng, u Rossiya rasmiylarining harakatlarini ochiq tanqid qilgan. Buning ortidan unga Rossiya Federatsiyasiga kirish rasman 50 yil muddatga — 2072-yilgacha taqiqlangan.
