Yugra (Xanti-Mansiysk avtonom okrugi) hukumati 2027-2029 yillarga mo'ljallangan soliq va budjet siyosati loyihasiga ko'ra, mehnat migrantlari uchun patent narxini oshirishni taklif qildi. Mintaqaviy koeffitsiyentni 4,284 dan 5,445 gacha, ya'ni 27 foizdan ko'proqqa ko'tarish rejalashtirilmoqda. Moliya departamenti ushbu tashabbusni xorijlik ishchilarning soliq yukini Rossiya fuqarolari to'laydigan 13 foizlik daromad solig'i stavkasiga yaqinlashtirish zarurati bilan izohlamoqda.
Ta'kidlash joizki, Yugrada patent narxi ketma-ket ikkinchi yil oshirilmoqda. 2026-yil uchun koeffitsiyent 3,565 dan 4,284 gacha ko'tarilgan edi, buning natijasida oylik to'lov 14 004 rublni tashkil etgan. Mintaqa rasmiylari ushbu chorani, birinchi navbatda, ish haqi yuqori bo'lgan qurilish va foydali qazilmalarni qazib olish sohalariga qaratilgan deb hisoblamoqda. Ushbu o'zgarishlar orqali budjetga qo'shimcha 1,6 milliard rubl tushum tushishi kutilmoqda.
Solishtirish uchun, qo'shni Tyumen viloyatida 2026-yil uchun koeffitsiyent 3,425 darajasida belgilangan bo'lib, patent qiymati oyiga 11 471 rublni tashkil etadi. Bu Yugradagi ko'rsatkichdan qariyb 2,5 ming rublga arzonroqdir.
Eslatib o'tamiz, Yugra hukumati 2026-yil 1-yanvardan boshlab patent asosida ishlaydigan xorijliklar uchun yana beshta sohada, jumladan, kuryerlik faoliyatida ishlashni taqiqlagan edi. Faktologia.com ma'lumotlariga ko'ra, soliq yukining oshishi mintaqadan xorijlik ishchilarning chiqib ketishiga va ayrim munitsipalitetlar, xususan, Surgut budjeti daromadlarining kamayishiga olib kelmoqda.
