Rossiya Davlat Dumasiga MDH davlatlari o'rtasida qarzdorlarni qidirishni nazarda tutuvchi yangi bitim kiritildi. Hujjat Rossiya, O'zbekiston, Ozarbayjon, Belarus, Qozog'iston, Qirg'iziston va Tojikiston tomonidan imzolangan. Ushbu kelishuv qarzdorlarning boshqa davlatlarga chiqib ketishi orqali o'z majburiyatlaridan qochish holatlarining oldini olishga qaratilgan.
Amaldagi tartibga ko'ra, aliment to'lovchilari yoki jarimalari mavjud shaxslar Rossiyadan chiqib ketgan taqdirda, sud ijrochilari ularning qayerdaligini aniqlashda qiyinchiliklarga duch kelmoqda. Natijada, qarzdorning ish joyi, daromadlari va mol-mulki to'g'risidagi ma'lumotlar yashirin qolib ketmoqda.
Bitim ratifikatsiya qilingach, sud ijrochilari MDH hududida qarzdorlarni qidirish, ularning ish joyi va daromadlari miqdorini aniqlash vakolatiga ega bo'ladi. Shuningdek, xorijiy davlatdagi hisob raqamlari, ko'chmas mulk va avtotransport vositalari kabi aktivlarni aniqlash imkoniyati yaratiladi.
To'plangan ma'lumotlar undiruvchilarga taqdim etiladi. Bu esa, masalan, aliment undirishda manfaatdor bo'lgan shaxslarga qarzdor joylashgan davlat sudlari orqali qarorlarni ijro etishga huquqiy asos yaratadi.
