Rossiyada migratsiya sohasini tartibga solish va nazoratni kuchaytirish masalalari muhokama qilinmoqda. «Adolatli Rossiya» partiyasi vakillari mamlakat migratsiya siyosatini o‘zgartirish, xususan, mehnat muhojirlari uchun yangi talablarni joriy etish bo‘yicha takliflar bildirmoqda. Ushbu tashabbuslar mehnat bozoridagi barqarorlikni ta’minlash hamda ijtimoiy soha yuklamasini kamaytirish maqsadida ilgari surilayotgani ta’kidlangan.
Partiya tomonidan taklif etilayotgan asosiy o‘zgarishlardan biri — patent tizimidan voz kechish va «keldi – ishladi – ketdi» tamoyilini joriy etishdir. Unga ko‘ra, ish beruvchi xorijlik mutaxassis bilan Rossiya chegarasini kesib o‘tishidan oldin aniq muddatga mo‘ljallangan mehnat shartnomasini imzolashi hamda xodimning yashash sharoiti va tibbiy sug‘urtasi uchun javobgarlikni zimmasiga olishi lozim. Shuningdek, ushbu tartib doirasida ishchilarning oila a’zolari bilan birga kelishi ko‘zda tutilmagan.
Bundan tashqari, xorijga pul o‘tkazmalariga nisbatan qo‘shimcha soliq joriy etish masalasi ko‘rib chiqilmoqda. Taklifga ko‘ra, chet elga yuborilayotgan mablag‘larning 3 foizi miqdorida maxsus to‘lov undirilishi mumkin. Shuningdek, migratsiya qonunchiligini buzganlik uchun javobgarlikni kuchaytirish va deportatsiya asoslarini kengaytirish taklif etilmoqda.
Ushbu tashabbuslar hozircha taklif darajasida bo‘lib, ularning qonuniy kuchga kirishi uchun Rossiya Davlat dumasi tomonidan tegishli hujjatlar qabul qilinishi kerak. Rossiyada ishlayotgan migrantlar ushbu yangiliklarni kuzatib borishlari va qonunchilikdagi o‘zgarishlar yuzasidan rasmiy manbalardan xabardor bo‘lishlari tavsiya etiladi.
