Sankt-Peterburg ma'muriyati 2027-yilda mehnat migrantlari uchun patent narxini hisoblashda qo'llaniladigan mintaqaviy koeffitsiyentni 3,225428 etib belgilashni taklif qildi. Ushbu loyiha 5-oktyabr kuni rasman e'lon qilindi va u shahardagi mehnat bozori xususiyatlarini aks ettiradi.
Taqqoslash uchun, 2024-yilda koeffitsiyent 1,597223 (patent narxi 4,6 ming rubl), 2025-yilda 1,927525 (6 ming rubl), 2026-yilda esa 2,570034 (8 ming rubl) darajasida bo'lgan. Yangi koeffitsiyent va federal indeks-deflator hisob-kitoblariga ko'ra, 2027-yilda patent qiymati 11,5 ming rubldan oshishi prognoz qilinmoqda.
Eslatib o'tamiz, patent O'zbekiston, Tojikiston, Ozarbayjon va Moldova kabi vizasiz tartibdagi davlatlar fuqarolariga Rossiyada ishlash huquqini beruvchi asosiy hujjat hisoblanadi. Ushbu hujjat Yevroosiyo iqtisodiy ittifoqiga a'zo bo'lmagan davlatlar fuqarolari uchun majburiydir.
Bundan tashqari, Peterburgda migrantlar uchun ish faoliyati sohasida cheklovlar kuchaymoqda. Avvalroq taksi va yetkazib berish xizmatlarida patent bilan ishlash taqiqlangan edi. Sentyabr oyida esa chakana savdo, fitnes-markazlar, sartaroshxonalar va go'zallik salonlari kabi bir qator sohalarda ham patent asosida ishlashni taqiqlash bo'yicha loyiha ishlab chiqildi.
