Rossiya mehnat bozorida ishchi kuchi tanqisligi muammosini hal qilish maqsadida yangi yondashuvlar muhokama qilinmoqda. "Opora Rossii" tashkiloti rahbari Aleksandr Kalininning fikricha, mamlakat iqtisodiyotiga qo‘shimcha 2 millionga yaqin xorijlik ishchi kerak. Hozirgi kunda Rossiyadagi xorijlik ishchilar soni 6 milliondan 4 million kishiga qisqargani ushbu tanqislikni yanada kuchaytirgan.
Mutaxassislar amaldagi patent tizimidan voz kechib, ishchilarni uyushgan holda jalb qilish (orgnabor) mexanizmiga o‘tishni taklif etmoqda. Ushbu tizimda ish beruvchi kompaniyalar xodimlarni o‘zlari izlaydi, ro‘yxatni shakllantiradi, ularning kelish xarajatlarini qoplaydi va belgilangan kvota asosida ma’lum muddatga ishga oladi.
Taklif mualliflarining ta’kidlashicha, hozirgi patent tizimi xorijlik fuqarolarga ish beruvchi va faoliyat sohasini erkin o‘zgartirish imkonini beradi, bu esa ba’zi hollarda shaffof bo‘lmagan mehnat munosabatlariga olib kelishi mumkin. Uyushgan holda ishga jalb qilish esa jarayonni yanada maqsadli va nazorat qilinadigan holatga keltirishi ko‘zda tutilgan.
Rossiya iqtisodiyotida mehnat unumdorligining o‘sish sur’ati (o‘rtacha 1,4%) mavjud bo‘sh ish o‘rinlarini to‘liq qoplash uchun yetarli emasligi qayd etilgan. Shu sababli, xorijlik ishchilarni jalb qilish tartibini o‘zgartirish kelgusida mehnat migratsiyasi siyosatida muhim o‘zgarishlarga sabab bo‘lishi mumkin.
